កម្មវិធី “Miss Planet International 2025” ដើម្បីផ្សព្វផ្សាយកម្ពុជា ជាគោលដៅទេសចរណ៍សុវត្ថិភាព

ក្រោមកិច្ចសហការរបស់ ឧកញ៉ា ឆាយ ស៊ីវលីន ប្រធានសមាគមទេសចរណ៍កម្ពុជា និងលោកស្រី ហាលី អាមី ប្រធានស្ថាប័នបវរកញ្ញា Miss Planet International បានរៀបចំកម្មវិធីនេះឡើងនៅរាជធានីភ្នំពេញ ក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញនឹងថ្លែងសុន្ទរកថាក្នុងកម្មវិធីបើកការប្រកួតវគ្គផ្តាច់ព្រ័ត្រ Miss Planet International 2025 ដែល ព្រមទាំងមានការចូលរួមពីឯកឧត្តម ឯក ប៊ុនថា អនុរដ្ឋលេខាធិការក្រសួងវប្បធម៌ និងវិចិត្រសិល្បៈ,​​ ទាំងភ្ញៀវជាតិ និងអន្តរជាតិជាងប្រមាណ ២,០០០ នាក់ មកពីបណ្តាប្រទេសនានាជុំវិញពិភពលោក។ កម្មវិធីនេះក៏មានការចូលរួមពីបេក្ខនារីចំនួន ៣៣ រូប មកពី ៣៣ ប្រទេស ហើយត្រូវបានផ្សាយបន្តផ្ទាល់ទៅកាន់ទស្សនិកជននៅគ្រប់ទ្វីបនៃពិភពលោក។ 

ក្នុងឱកាសនេះ ឯកឧត្តមរដ្ឋមន្ត្រី បានគូសបញ្ជាក់ថា កម្ពុជា គឺជាគោលដៅទេសចរណ៍ប្រកបដោយសុខសុវត្ថិភាព និងមានសក្តានុពលទេសចរណ៍ខ្ពស់ ដោយមានធនធានធម្មជាតិ បេតិកភណ្ឌវប្បធម៌ តំបន់ឆ្នេរសមុទ្រដ៏ស្រស់ស្អាត និងបដិសណ្ឋារកិច្ចដ៏កក់ក្តៅរបស់ប្រជាជនកម្ពុជា។ បន្ថែមពីនេះ ឯកឧត្តមរដ្ឋមន្ត្រីបានបញ្ជាក់ថា កម្ពុជា បាននិងកំពុងធានាបាននូវសុខសុវត្ថិភាព និងសន្តិសុខសម្រាប់អ្នកធ្វើដំណើរ និងភ្ញៀវទេសចរអន្តរជាតិទាំងអស់។ ការរៀបចំព្រឹត្តិការណ៍ Miss Planet International 2025 នៅរាជធានីភ្នំពេញ ក៏បានបង្ហាញពីសមត្ថភាព និងសក្ដានុពលរបស់កម្ពុជា ក្នុងការរៀបចំព្រឹត្តិការណ៍អន្តរជាតិធំៗ ព្រមទាំងបង្ហាញពីបរិយាកាសសុខសុវត្ថិភាព និងការអភិវឌ្ឍដ៏រស់រវើករបស់រាជធានីភ្នំពេញ ដែលជាបេះដូងនៃព្រះរាជាណាចក្រកម្ពុជា។